Abadiñoko Udalak bere azken Osoko Bilkuran Berdintasunerako III. Plana onartu du, emakume eta gizonen arteko benetako berdintasunean oinarritutako gizarte bat lortzeko bidean aurrera egiten jarraitzeko.
Rosa Maria Miguel Perez Abadiñoko Berdintasun eta Aniztasun arloko zinegotziak esan duenez, Plan hau indarrean egongo da 2021etik 2024ra arte, eta diskriminazioari aurre egiteko eta emakumeen ahalduntzea bultzatzeko neurri zehatzak biltzen ditu.
“Plan honekin Udalari tresna eraginkor bat eman nahi diogu berdintasuna arlo guztietan bultzatzeko”, azaldu du. Rosa Maria Miguelek azpimarratu duenez, Udalak eta herritarrek desberdintasunaren aurka egindako lanaren azterketa-prozesu baten emaitza izan da Plana. Lan horren barruan, elkarrizketak egin dira eta batzar ireki bat antolatu da herriaren egungo beharrizanak eta erronkak identifikatzeko.
Abadiñoko Berdintasun eta Aniztasun arloko zinegotziak esan duenez, Planak “lau ardatz nagusi” ditu: politika publiko guztietan berdintasunaren printzipioa bultzatzeko ekimenak, emakumeen ahalduntzea, berdintasunezko antolaketa soziala lortzea, eta indarkeria matxistaren aurkako borroka.
Herritarrei III. Berdintasun Planaren garrantziaren berri emateko, Abadiñoko Udalak bideo informatibo bat eta triptiko bat argitaratu ditu Planaren eduki nagusiekin. Biak osorik daude ikusgai udalaren webgunean.
