EHUk garapenari buruzko pentsamendu kritikoen ikastaroa eskainiko du Hegoa Institutoak antolatuta. Formakuntza doan eta online izango da. ‘EmantzipAkzioa: beste mundu posible batzuetarako teoria eta praktika kritikoak’ ikastaroa Hegoak 2019 eta 2020an gauzatutako ‘Garapenari buruzko Pentsamendu Kritikoak: teoriak, ikuspegiak eta esperientziak’ proiektuaren barruan kokatzen da.
Ikastaroaren bidez, proiektu horretan sortutako ikaskuntzak zabaldu nahi dira, garapenari dagokionez kritikoak diren hiru ikuspegiren inguruan: postgarapena eta beste aukera praktiko batzuk; bestelako feminismoak eta bizitzaren iraunkortasuna; eta iraunkortasun ekologikoa.
Gizarte eraldaketa
Hegoak-ekoek adierazi zutenez, “gizarte eraldaketaren esparruan interesa duten UPV/EHUko eta beste unibertsitate batzuetako graduko eta graduondoko ikasleei zuzenduta dago ikastaroa, bai eta GGKE-etako eta/edo gizarte mugimenduetako kideei ere”.
Edukiak ikuspegi teoriko-praktikotik landuko dira, 4 modulutan banatuta eta ele bitan:
- modulua: Garapenari buruzko diskurtsoen azterketa kritikoa
- modulua: Postgarapena eta dekolonialitatea
- modulua: Bestelako feminismoak eta bizitzaren iraunkortasuna
- modulua: Iraunkortasun ekologikoa
50 orduko ikastaroa izango da (2 ECTS kreditu), eta UPV/EHUko eGelaPI plataforman jarraitu ahal izango da, 8 astetan zehar (otsailaren 15etik apirilaren 11ra). Doakoa da. Izena emateko epea urtarrilaren 31n bukatuko da eta esteka honetan egin daiteke.
